یوںہی نہیں ہوں خود سے میں باہر پڑا ہوا

یوںہی نہیں ہوں خود سے میں باہر پڑا ہوا

کوئی ہے آج کل مرے اندر پڑا ہوا

یہ کائنات ہے نہیں آماجگاہ خیر

ہر خیر میں ملے گا کوئی شر پڑا ہوا

چلتا ہوں تیری راہ میں جوتے نکال کر

حالانکہ ہر قدم پہ ہے کنکر پڑا ہوا

دیوان سے پڑھو مرے اشعار رہزنو

دیوان میں ملے گا تمہیں زر پڑا ہوا

ڈوبے ہیں اس کو دیکھ کے تیراک بھی ہزار

ہے جل پری کی آنکھ میں ساگر پڑا ہوا

پاؤں کے نیچے تیرے مرا آ گیا تھا دل

تب سے ہے نقش پا مرے دل پر پڑا ہوا