yunhi nahin hun KHud se main bahar paDa hua

yūñhī nahīñ huuñ ḳhud se maiñ bāhar paḌā huā

koī hai āj-kal mire andar paḌā huā

ye kā.enāt hai nahīñ āmājgāh-e-ḳhair

har ḳhair meñ milegā koī shar paḌā huā

chaltā huuñ terī raah meñ juute nikāl kar

hālāñki har qadam pe hai kankar paḌā huā

dīvān se paḌho mire ash'ār rah-zano

dīvān meñ milegā tumheñ zar paḌā huā

Duube haiñ us ko dekh ke tairāk bhī hazār

hai jal-parī kī aañkh meñ sāgar paḌā huā

paañv ke nīche tere mirā aa gayā thā dil

tab se hai naqsh-e-pā mire dil par paḌā huā

yunhi nahin hun KHud se main bahar paDa hua

koi hai aaj-kal mere andar paDa hua

ye kaenat hai nahin aamajgah-e-KHair

har KHair mein milega koi shar paDa hua

chalta hun teri rah mein jute nikal kar

haalanki har qadam pe hai kankar paDa hua

diwan se paDho mere ash'ar rah-zano

diwan mein milega tumhein zar paDa hua

Dube hain us ko dekh ke tairak bhi hazar

hai jal-pari ki aankh mein sagar paDa hua

panw ke niche tere mera aa gaya tha dil

tab se hai naqsh-e-pa mere dil par paDa hua