yunhi ranjish ho aur gila bhi yunhi

yūñhī ranjish ho aur gilā bhī yūñhī

ho je har baat par ḳhafā bhī yūñhī

kuchh na ham ko hī bhā gayā ye taur

vāqa.ī ye ki hai mazā bhī yūñhī

said-e-kanjashk se na haath uThā

aa ke phañs jaa.e hai humā bhī yūñhī

juuñ ujāḌā tū ghar mirā ai ishq

ḳhāna vīrān ho tirā bhī yūñhī

kyuuñ na ro.uuñ maiñ dekh ḳhanda-e-gul

ki hañse thā vo bevafā bhī yūñhī

ab talak merī ziist ne kī vafā

bas maiñ dekhī tirī jafā bhī yūñhī

mas-e-dil ko diyā kar apne gudāz

haath chaḌh jā hai kīmiyā bhī yūñhī

ye kahāñ aur vo gul kidhar 'qā.em'

ik havā bāñdhe hai sabā bhī yūñhī

yunhi ranjish ho aur gila bhi yunhi

ho je har baat par KHafa bhi yunhi

kuchh na hum ko hi bha gaya ye taur

waqai ye ki hai maza bhi yunhi

said-e-kanjashk se na hath uTha

aa ke phans jae hai huma bhi yunhi

jun ujaDa tu ghar mera ai ishq

KHana viran ho tera bhi yunhi

kyun na roun main dekh KHanda-e-gul

ki hanse tha wo bewafa bhi yunhi

ab talak meri zist ne ki wafa

bas main dekhi teri jafa bhi yunhi

mas-e-dil ko diya kar apne gudaz

hath chaDh ja hai kimiya bhi yunhi

ye kahan aur wo gul kidhar 'qaem'

ek hawa bandhe hai saba bhi yunhi