yunhi to shaKH se patte gira nahin karte

yūñhī to shāḳh se patte girā nahīñ karte

bichhaḌ ke log ziyāda jiyā nahīñ karte

jo aane vaale haiñ mausam unheñ shumār meñ rakh

jo din guzar ga.e un ko ginā nahīñ karte

na dekhā jaan ke us ne koī sabab hogā

isī ḳhayāl se ham dil burā nahīñ karte

vo mil gayā hai to kyā qissa-e-firāq kaheñ

ḳhushī ke lamhoñ ko yuuñ be-mazā nahīñ karte

nashāt-e-qurb ġham-e-hijr ke evaz mat maañg

duā ke naam pe yuuñ bad-duā nahīñ karte

munāfiqat pe jinheñ iḳhtiyār hāsil hai

vo arz karte haiñ tujh se gila nahīñ karte

hamāre qatl pe 'mohsin' ye pesh-o-pas kaisī

ham aise log talab ḳhūñ-bahā nahīñ karte

yunhi to shaKH se patte gira nahin karte

bichhaD ke log ziyaada jiya nahin karte

jo aane wale hain mausam unhen shumar mein rakh

jo din guzar gae un ko gina nahin karte

na dekha jaan ke us ne koi sabab hoga

isi KHayal se hum dil bura nahin karte

wo mil gaya hai to kya qissa-e-firaq kahen

KHushi ke lamhon ko yun be-maza nahin karte

nashat-e-qurb gham-e-hijr ke ewaz mat mang

dua ke nam pe yun bad-dua nahin karte

munafiqat pe jinhen iKHtiyar hasil hai

wo arz karte hain tujh se gila nahin karte

hamare qatl pe 'mohsin' ye pesh-o-pas kaisi

hum aise log talab KHun-baha nahin karte