yurish-e-gham se dil-o-jaan ko bachaun kaise

yūrish-e-ġham se dil-o-jāñ ko bachā.ūñ kaise

so rahī hai mirī taqdīr jagā.ūñ kaise

aql kuchh kahtī hai aur dil ke taqāze haiñ kuchh aur

ā.īna mujh se jo kahtā hai batā.ūñ kaise

ashk to pī liye nāmūs-e-vafā kī ḳhātir

ġham jo chehre se jhalaktā hai chhupā.ūñ kaise

dil hī jab mujh se baġhāvat pe kamar-basta ho

us ke hāthoñ meñ ho āñchal to chhuḌā.ūñ kaise

hai udhar us kī mohabbat to idhar majbūrī

dil ke āñgan kī ye dīvār girā.ūñ kaise

bazm meñ chheḌtī rahtī haiñ kisī kī nazreñ

dil machal jaa.e jo aise meñ manā.ūñ kaise

qahqahoñ ne hī bharam rakkhā hai ab tak merā

ho ke sanjīda 'vafā' ashk chhupā.ūñ kaise

yurish-e-gham se dil-o-jaan ko bachaun kaise

so rahi hai meri taqdir jagaun kaise

aql kuchh kahti hai aur dil ke taqaze hain kuchh aur

aaina mujh se jo kahta hai bataun kaise

ashk to pi liye namus-e-wafa ki KHatir

gham jo chehre se jhalakta hai chhupaun kaise

dil hi jab mujh se baghawat pe kamar-basta ho

us ke hathon mein ho aanchal to chhuDaun kaise

hai udhar us ki mohabbat to idhar majburi

dil ke aangan ki ye diwar giraun kaise

bazm mein chheDti rahti hain kisi ki nazren

dil machal jae jo aise mein manaun kaise

qahqahon ne hi bharam rakkha hai ab tak mera

ho ke sanjida 'wafa' ashk chhupaun kaise