yusuf ki tarah raunaq-e-bazar rahe hain

yūsuf kī tarah raunaq-e-bāzār rahe haiñ

bikne ke liye shauq se tayyār rahe haiñ

ham ne kabhī sūraj se ujālā nahīñ māñgā

ik chāñd se chehre ke talabgār rahe haiñ

dīvānoñ ko zanjīr kā kuchh ḳhauf nahīñ hai

tā-umr to zulfoñ meñ giraftār rahe haiñ

kyā hogā nasha zar se ḳharīdī huī mai meñ

ham āñkhoñ se piine ke gunahgār rahe haiñ

lekin hameñ be-māya-o-bekār na jaano

maanā tirī bastī meñ baḌe ḳhvār rahe haiñ

bhūle se kabhī un ko siyahkār na kahnā

jo log haqīqat meñ siyahkār rahe haiñ

behtar hai karo un kī satā.ish sar-e-mahfil

kah do ki baḌe sāhib-e-kirdār rahe haiñ

maanā ki baḌe sahl haiñ tere liye ham log

duniyā ke liye uqda-e-dushvār rahe haiñ

har gosha-e-tārīk munavvar kiyā ham ne

har bazm meñ ham the jo ziyā-bār rahe haiñ

yusuf ki tarah raunaq-e-bazar rahe hain

bikne ke liye shauq se tayyar rahe hain

hum ne kabhi suraj se ujala nahin manga

ek chand se chehre ke talabgar rahe hain

diwanon ko zanjir ka kuchh KHauf nahin hai

ta-umr to zulfon mein giraftar rahe hain

kya hoga nasha zar se KHaridi hui mai mein

hum aankhon se pine ke gunahgar rahe hain

lekin hamein be-maya-o-bekar na jaano

mana teri basti mein baDe KHwar rahe hain

bhule se kabhi un ko siyahkar na kahna

jo log haqiqat mein siyahkar rahe hain

behtar hai karo un ki sataish sar-e-mahfil

kah do ki baDe sahib-e-kirdar rahe hain

mana ki baDe sahl hain tere liye hum log

duniya ke liye uqda-e-dushwar rahe hain

har gosha-e-tarik munawwar kiya hum ne

har bazm mein hum the jo ziya-bar rahe hain