zahid teri nigah KHuda-ashna nahin

zāhid tirī nigāh ḳhudā-āshnā nahīñ

tū jāntā zarūr hai pahchāntā nahīñ

jangal ke phuul se hai ibārat mirā nasīb

vo naav huuñ ki jis kā koī nāḳhudā nahīñ

kyā jaane kaise shahr-e-ḳhamoshāñ ke log haiñ

āvāz de rahā huuñ koī boltā nahīñ

hairat hai jis kā tāj-mahal pesh-e-lafz hai

logoñ ne us kitāb ko ab tak paḌhā nahīñ

le aa.ī hai mohabbat-e-insāñ mujhe vahāñ

jis rāste meñ aur koī naqsh-e-pā nahīñ

kyā hogā is safīne kā anjām ai 'nihāl'

tūfāñ se khelne kā jise hausla nahīñ

zahid teri nigah KHuda-ashna nahin

tu jaanta zarur hai pahchanta nahin

jangal ke phul se hai ibarat mera nasib

wo naw hun ki jis ka koi naKHuda nahin

kya jaane kaise shahr-e-KHamoshan ke log hain

aawaz de raha hun koi bolta nahin

hairat hai jis ka taj-mahal pesh-e-lafz hai

logon ne us kitab ko ab tak paDha nahin

le aai hai mohabbat-e-insan mujhe wahan

jis raste mein aur koi naqsh-e-pa nahin

kya hoga is safine ka anjam ai 'nihaal'

tufan se khelne ka jise hausla nahin