ظاہر دو رنگیٔ چمن روزگار ہے

ظاہر دو رنگیٔ چمن روزگار ہے

دو دن خزاں ہے باغ میں دو دن بہار ہے

جامہ گلوں کا ہجر میں شب تار تار ہے

بلبل اسیر دام ہے قمری شکار ہے

ان کی صفائیوں کا کسے اعتبار ہے

دل میں بہ شکل آئنہ جن کے غبار ہے

غنچے شگفتہ ہوتے ہیں نالاں ہزار ہے

بلبل کی ہے خزاں تو گلوں کی بہار ہے

ہاتھوں اچھل رہا ہے جگر اضطرار ہے

کیا بے قرار آج دل بے قرار ہے

مرنے پہ بھی شکستہ دلی آشکار ہے

بکسا ہوا چہار طرف سے مزار ہے

کروٹ ادھر ادھر کی بدلنا محال ہے

بیتاب دل مرا ہے جگر بے قرار ہے

عاشق سے کجروی نہ کرے کیوں وہ ماہ وش

سیدھا کسی سے کب فلک کج مدار ہے

مقتل میں زخمیوں کو ہو پانی کی خاک چاہ

ہیں تیغ نگاہ یار بڑی آب دار ہے

پانی کی طرح صاف ہیں ظاہر میں یہ حسین

باطن میں شکل آئنہ لیکن غبار ہے

آنکھوں میں آ کے جان نکلتی نہیں مری

کچھ موت سے بھی سخت شب انتظار ہے

کچھ بن گئی ہے میرے کبوتر پہ راہ میں

آنکھوں کو انتظار ہے دل بے قرار ہے

ابروئے یار سے یہ پسینہ ہے کب رواں

جاری سبیل آب دم ذوالفقار ہے

ظلم ان بتوں کے تجھ پہ رہیں گے یوہیں صدا

اے دل یہی مشیت پروردگار ہے

کیا پوچھتے ہو دل مرا لینے کو اے بتو

گو جبر ہے پہ خیر تمہیں اختیار ہے

بے وجہ زلزلہ نہیں آیا جہان میں

شاید کسی کا قبر میں دل بے قرار ہے

شق جا بجا سے ہو گیا سنگ سر لحد

یوں بے قرار آج دل بے قرار ہے

کیونکر نہ کھاؤں کوہ و بیاباں کی ٹھوکریں

بندہ نواز دل پہ کسے اختیار ہے

اک سنگ دل لحد کا مرے سنگ لے گیا

افسوس بے نشان ہمارا مزار ہے

مدفن مرا بنا کے رقیبوں سے یہ کہا

جو مجھ پہ مر گیا ہے یہ اس کا مزار ہے

منظور وصل ہے تو کرو آج ہی قبول

دنیا میں زندگی کا کسے اعتبار ہے

نادم ہوں میں تو اپنے گناہوں پہ اے کریم

اب بخشے یا نہ بخشے تجھے اختیار ہے

جاں کندنی میں دیکھ کے پوچھا کسی سے یوں

یہ وقت نزع ہے کہ دم اہتزار ہے

آہستہ رکھو قبر پہ اے رہروو قدم

ہے پاش پاش دل تو کلیجہ فگار ہے

رخصت کو میں مصر جو ہوا ہنس کے یہ کہا

جاتے ہو گر تو جاؤ تمہیں اختیار ہے

آتے ہیں وہ کبھی جو مری قبر کی طرف

ٹھکرا کے پوچھتے ہیں یہ کس کا مزار ہے

کیونکر مزاج میں نہ ہو فاخرؔ کے انکسار

خادم ابو تراب کا ہے خاکسار ہے