zahir do-rangi-e-chaman-e-rozgar hai

zāhir do-rangī-e-chaman-e-rozgār hai

do din ḳhizāñ hai baaġh meñ do din bahār hai

jaama guloñ kā hijr meñ shab tār-tār hai

bulbul asīr-e-dām hai qumrī shikār hai

un kī safā.iyoñ kā kise e.atibār hai

dil meñ ba-shakl-e-ā.ina jin ke ġhubār hai

ġhunche shagufta hote haiñ nālāñ hazār hai

bulbul kī hai ḳhizāñ to guloñ kī bahār hai

hāthoñ uchhal rahā hai jigar iztirār hai

kyā be-qarār aaj dil-e-be-qarār hai

marne pe bhī shikasta-dilī āshkār hai

biksā huā chahār taraf se mazār hai

karvaT idhar-udhar kī badalnā muhāl hai

betāb dil mirā hai jigar be-qarār hai

āshiq se kajravī na kare kyoñ vo māh-vash

sīdhā kisī se kab falak-e-kaj-madār hai

maqtal meñ zaḳhmiyoñ ko ho paanī kī ḳhaak chaah

teġh-e-nigāh-e-yār baḌī āb-dār hai

paanī kī tarah saaf haiñ zāhir meñ ye hasīn

bātin meñ shakl-e-ā.ina lekin ġhubār hai

āñkhoñ meñ aa ke jaan nikaltī nahīñ mirī

kuchh maut se bhī saḳht shab-e-intizār hai

kuchh ban ga.ī hai mere kabūtar pe raah meñ

āñkhoñ ko intizār hai dil be-qarār hai

abrū-e-yār se ye pasīna hai kab ravāñ

jaarī sabīl-e-āb-e-dam-e-zulfiqār hai

zulm in butoñ ke tujh pe raheñge yūhīñ sadā

ai dil yahī mashiyyat-e-parvardigār hai

kyā pūchhte ho dil mirā lene ko ai buto

go jabr hai pe ḳhair tumheñ iḳhtiyār hai

be-vaj.h zalzala nahīñ aaya jahān meñ

shāyad kisī kā qabr meñ dil be-qarār hai

shaq jā-ba-jā se ho gayā sang-e-sar-e-lahad

yuuñ be-qarār aaj dil-e-be-qarār hai

kyūñkar na khā.ūñ koh-o-bayābāñ kī Thokareñ

banda-navāz dil pe kise iḳhtiyār hai

ik sang-dil lahad kā mire sang le gayā

afsos be-nishān hamārā mazār hai

madfan mirā banā ke raqīboñ se ye kahā

jo mujh pe mar gayā hai ye us kā mazār hai

manzūr vasl hai to karo aaj hī qubūl

duniyā meñ zindagī kā kise e.atibār hai

nādim huuñ maiñ to apne gunāhoñ pe ai karīm

ab baḳhshe yā na baḳhshe tujhe iḳhtiyār hai

jāñ-kandanī meñ dekh ke pūchhā kisī se yuuñ

ye vaqt-e-naz.a hai ki dam-e-ehtizār hai

āhista rakkho qabr pe ai rahravo qadam

hai pāsh-pāsh dil to kaleja figār hai

ruḳhsat ko maiñ musir jo huā hañs ke ye kahā

jaate ho gar to jaao tumheñ iḳhtiyār hai

aate haiñ vo kabhī jo mirī qabr kī taraf

Thukrā ke pūchhte haiñ ye kis kā mazār hai

kyūñkar mizāj meñ na ho 'fāḳhir' ke inkisār

ḳhādim abū-turāb kā hai ḳhāksār hai

zahir do-rangi-e-chaman-e-rozgar hai

do din KHizan hai bagh mein do din bahaar hai

jama gulon ka hijr mein shab tar-tar hai

bulbul asir-e-dam hai qumri shikar hai

un ki safaiyon ka kise eatibar hai

dil mein ba-shakl-e-aina jin ke ghubar hai

ghunche shagufta hote hain nalan hazar hai

bulbul ki hai KHizan to gulon ki bahaar hai

hathon uchhal raha hai jigar iztirar hai

kya be-qarar aaj dil-e-be-qarar hai

marne pe bhi shikasta-dili aashkar hai

biksa hua chahaar taraf se mazar hai

karwaT idhar-udhar ki badalna muhaal hai

betab dil mera hai jigar be-qarar hai

aashiq se kajrawi na kare kyon wo mah-wash

sidha kisi se kab falak-e-kaj-madar hai

maqtal mein zaKHmiyon ko ho pani ki KHak chah

tegh-e-nigah-e-yar baDi aab-dar hai

pani ki tarah saf hain zahir mein ye hasin

baatin mein shakl-e-aina lekin ghubar hai

aankhon mein aa ke jaan nikalti nahin meri

kuchh maut se bhi saKHt shab-e-intizar hai

kuchh ban gai hai mere kabutar pe rah mein

aankhon ko intizar hai dil be-qarar hai

abru-e-yar se ye pasina hai kab rawan

jari sabil-e-ab-e-dam-e-zulfiqar hai

zulm in buton ke tujh pe rahenge yuhin sada

ai dil yahi mashiyyat-e-parwardigar hai

kya puchhte ho dil mera lene ko ai buto

go jabr hai pe KHair tumhein iKHtiyar hai

be-wajh zalzala nahin aaya jahan mein

shayad kisi ka qabr mein dil be-qarar hai

shaq ja-ba-ja se ho gaya sang-e-sar-e-lahad

yun be-qarar aaj dil-e-be-qarar hai

kyunkar na khaun koh-o-bayaban ki Thokaren

banda-nawaz dil pe kise iKHtiyar hai

ek sang-dil lahad ka mere sang le gaya

afsos be-nishan hamara mazar hai

madfan mera bana ke raqibon se ye kaha

jo mujh pe mar gaya hai ye us ka mazar hai

manzur wasl hai to karo aaj hi qubul

duniya mein zindagi ka kise eatibar hai

nadim hun main to apne gunahon pe ai karim

ab baKHshe ya na baKHshe tujhe iKHtiyar hai

jaan-kandani mein dekh ke puchha kisi se yun

ye waqt-e-naza hai ki dam-e-ehtizar hai

aahista rakkho qabr pe ai rahrawo qadam

hai pash-pash dil to kaleja figar hai

ruKHsat ko main musir jo hua hans ke ye kaha

jate ho gar to jao tumhein iKHtiyar hai

aate hain wo kabhi jo meri qabr ki taraf

Thukra ke puchhte hain ye kis ka mazar hai

kyunkar mizaj mein na ho 'faKHir' ke inkisar

KHadim abu-turab ka hai KHaksar hai