zahir tu hai to main nihan hun

zāhir tū hai to maiñ nihāñ huuñ

bātin tū hai to maiñ ayaañ huuñ

tū hī zāhir hai tū hī bātin

tū hī tū hai to maiñ kahāñ huuñ

tere hote kahīñ nahīñ maiñ

avval āḳhir na darmiyāñ huuñ

tū tū maiñ maiñ ne maar Daalā

dam band hai kījiye na haañ huuñ

maiñ hī lailā huuñ maiñ hī mahmil

naaqa bhī huuñ maiñ hī sārbāñ huuñ

huuñ kunj-e-qafas meñ band lekin

bairūn-e-zamīn-o-āsmāñ huuñ

dariyā kī tarah ravāñ huuñ lekin

ab tak bhī vahīñ huuñ maiñ jahāñ huuñ

juz naam nahīñ nishān merā

sach-much maiñ bahr-e-be-karāñ huuñ

zahir tu hai to main nihan hun

baatin tu hai to main ayan hun

tu hi zahir hai tu hi baatin

tu hi tu hai to main kahan hun

tere hote kahin nahin main

awwal aaKHir na darmiyan hun

tu tu main main ne mar Dala

dam band hai kijiye na han hun

main hi laila hun main hi mahmil

naqa bhi hun main hi sarban hun

hun kunj-e-qafas mein band lekin

bairun-e-zamin-o-asman hun

dariya ki tarah rawan hun lekin

ab tak bhi wahin hun main jahan hun

juz nam nahin nishan mera

sach-much main bahr-e-be-karan hun