ظاہری بصارت کی آگہی بے معنی ہے

ظاہری بصارت کی آگہی بے معنی ہے

مضطرب نگہ تجھ کو ڈھونڈھتی بے معنی ہے

خوش نما بہاروں میں جی مرا نہیں لگتا

تیرے روٹھ جانے سے زندگی بے معنی ہے

ظلم کی حکومت ہے کارگاہ ہستی پر

رقص کرنا واجب ہے سرکشی بے معنی ہے

رفتگاں نے چھانی ہے خاک کوئے جاناں کی

ذلتیں مقدر ہیں واپسی بے معنی ہے

ہم خیال ہوں تو پھر لازمی محبت کر

ایرے غیرے لوگوں سے دل لگی بے معنی ہے

ان کے آنے جانے سے زخم مسکرانے سے

خوش اگر نہیں کوئی عاشقی بے معنی ہے

لن ترانی سننے کا لطف ہے عجب جوگیؔ

حاصل طلب میں تو بندگی بے معنی ہے