zahiri basarat ki aagahi be-mani hai

zāhirī basārat kī āgahī be-mā'nī hai

muztarib nigah tujh ko DhūñDhtī be-mā'nī hai

ḳhushnumā bahāroñ meñ jī mirā nahīñ lagtā

tere ruuTh jaane se zindagī be-mā'nī hai

zulm kī hukūmat hai kār-gāh-e-hastī par

raqs karnā vājib hai sar-kashī be-mā'nī hai

raftagāñ ne chhānī hai ḳhaak kū-e-jānāñ kī

zillateñ muqaddar haiñ vāpsī be-mā'nī hai

ham-ḳhayāl hoñ to phir lāzmī mohabbat kar

aire-ġhaire logoñ se dil-lagī be-mā'nī hai

un ke aane jaane se zaḳhm muskurāne se

ḳhush agar nahīñ koī 'āshiqī be-mā'nī hai

lan-tarānī sunñe kā lutf hai 'ajab 'jogī'

hāsil-e-talab meñ to bandagī be-mā'nī hai

zahiri basarat ki aagahi be-ma'ni hai

muztarib nigah tujh ko DhunDhti be-ma'ni hai

KHushnuma bahaaron mein ji mera nahin lagta

tere ruTh jaane se zindagi be-ma'ni hai

zulm ki hukumat hai kar-gah-e-hasti par

raqs karna wajib hai sar-kashi be-ma'ni hai

raftagan ne chhani hai KHak ku-e-jaanan ki

zillaten muqaddar hain wapsi be-ma'ni hai

ham-KHayal hon to phir lazmi mohabbat kar

aire-ghaire logon se dil-lagi be-ma'ni hai

un ke aane jaane se zaKHm muskurane se

KHush agar nahin koi 'ashiqi be-ma'ni hai

lan-tarani sunne ka lutf hai 'ajab 'jogi'

hasil-e-talab mein to bandagi be-ma'ni hai