zalim hai wo aisa ki jafa bhi nahin karta

zālim hai vo aisā ki jafā bhī nahīñ kartā

raste se bichhaḌne kā galā bhī nahīñ kartā

har jurm-o-ḳhatā se mire vāqif hai vo phir bhī

tajvīz mare naam sazā bhī nahīñ kartā

insān hai vo koī farishta to nahīñ hai

hairat hai magar koī ḳhatā bhī nahīñ kartā

har shaḳhs se vo haath milā letā hai rasman

lekin vo kabhī dil se milā bhī nahīñ kartā

vaise to banā rahtā hai vo putlā vafā kā

kyā haal hai merā vo patā bhī nahīñ kartā

is taur se us ne mujhe barbād kiyā hai

aise to zamāne meñ ḳhudā bhī nahīñ kartā

'firdaus' se milnā ho to maiḳhāne meñ DhūñDo

vo shaḳhs to ab ghar meñ rahā bhī nahīñ kartā

zalim hai wo aisa ki jafa bhi nahin karta

raste se bichhaDne ka gala bhi nahin karta

har jurm-o-KHata se mere waqif hai wo phir bhi

tajwiz mare nam saza bhi nahin karta

insan hai wo koi farishta to nahin hai

hairat hai magar koi KHata bhi nahin karta

har shaKHs se wo hath mila leta hai rasman

lekin wo kabhi dil se mila bhi nahin karta

waise to bana rahta hai wo putla wafa ka

kya haal hai mera wo pata bhi nahin karta

is taur se us ne mujhe barbaad kiya hai

aise to zamane mein KHuda bhi nahin karta

'firdaus' se milna ho to maiKHane mein DhunDo

wo shaKHs to ab ghar mein raha bhi nahin karta