ظالم کے آگے سر کو جھکایا نہیں کبھی

ظالم کے آگے سر کو جھکایا نہیں کبھی

یعنی کہ قد کو اپنے گھٹایا نہیں کبھی

دنیا نے میرے دل کو دکھایا ہے بار بار

میں نے کسی کے دل کو دکھایا نہیں کبھی

غم یہ نہیں کہ چھوڑ کے مجھ کو چلا گیا

غم یہ ہے پھر وہ لوٹ کے آیا نہیں کبھی

اک وہ ہے مجھ کو یاد بھی کرتا نہیں مگر

اک میں ہوں جس نے اس کو بھلایا نہیں کبھی

یوں تو خدا نے مجھ کو سبھی کچھ عطا کیا

پر جو میں چاہتا تھا وہ پایا نہیں کبھی

اس کی طرف سے دوستو ترک وفا کے بعد

میں بھی اسے نگاہ میں لایا نہیں کبھی

میں تو وفا نبھاتا رہا عمر بھر ملکؔ

اس نے ہی اپنا فرض نبھایا نہیں کبھی