zalim ye KHamoshi beja hai iqrar nahin inkar to ho

zālim ye ḳhamoshī bejā hai iqrār nahīñ inkār to ho

ik aah to nikle toḌ ke dil naġhme na sahī jhankār to ho

har saañs meñ sad.hā naġhme haiñ har zarre meñ lākhoñ jalve haiñ

jaañ mahv-e-rumūz-e-sāz to ho dil jalva-gah-e-anvār to ho

shāḳhoñ kī lachak har fasl meñ hai saaqī kī jhalak har rañg meñ hai

sāġhar kī khanak har zarf meñ hai maḳhmūr to ho sarshār to ho

kyūñkar na shab-e-mah raushan ho kyuuñ sub.h na dāman chaak kare

kuchh vasf-e-rumūz-e-husn to ho kuchh sharh-e-jamāl-e-yār to ho

siine meñ ḳhatā.eñ muztar haiñ in.aam kā vo iqrār kareñ

mansūr hazāroñ ab bhī haiñ ai 'josh' sile meñ daar to ho

zalim ye KHamoshi beja hai iqrar nahin inkar to ho

ek aah to nikle toD ke dil naghme na sahi jhankar to ho

har sans mein sadha naghme hain har zarre mein lakhon jalwe hain

jaan mahw-e-rumuz-e-saz to ho dil jalwa-gah-e-anwar to ho

shaKHon ki lachak har fasl mein hai saqi ki jhalak har rang mein hai

saghar ki khanak har zarf mein hai maKHmur to ho sarshaar to ho

kyunkar na shab-e-mah raushan ho kyun subh na daman chaak kare

kuchh wasf-e-rumuz-e-husn to ho kuchh sharh-e-jamal-e-yar to ho

sine mein KHataen muztar hain inam ka wo iqrar karen

mansur hazaron ab bhi hain ai 'josh' sile mein dar to ho