zat ka gahra andhera hai bikhar ja mujh mein

zaat kā gahrā añdherā hai bikhar jā mujh meñ

Dūbtī shaam ke sūraj tū utar jā mujh meñ

ibn-e-ādam huuñ maiñ shahzāda-e-ta.amīr-e-hayāt

tū jo bigḌā ho to ai vaqt sañvar jā mujh meñ

phir se ik shakl na.ī tujh ko atā kar dūñgā

ai mirī ziist kisī roz tū mar jā mujh meñ

aa.e aur biit ga.e kitne hī sāvan lekin

koī jazba koī bādal nahīñ garjā mujh meñ

saḳht-jānī pe mirī kartī hai duniyā hairat

zindagī apnā koī zahr hī bhar jā mujh meñ

terī pairāhan-e-alfāz se taz.īn karūñ

ai mire karb zarā der Thahar jā mujh meñ

ruuh kā dasht huuñ sahrā-e-taḳhayyul huuñ maiñ

har taraf ek udāsī hai guzar jā mujh meñ

ye sadā-e-pas-e-anfās kā parda kab tak

tū kahīñ hai to taḌap aur ubhar jā mujh meñ

rañg huuñ giit huuñ naġhma huuñ maiñ ḳhushbū huuñ 'shakīl'

ziist hī ziist hai bikhrī huī har jā mujh meñ

zat ka gahra andhera hai bikhar ja mujh mein

Dubti sham ke suraj tu utar ja mujh mein

ibn-e-adam hun main shahzada-e-tamir-e-hayat

tu jo bigDa ho to ai waqt sanwar ja mujh mein

phir se ek shakl nai tujh ko ata kar dunga

ai meri zist kisi roz tu mar ja mujh mein

aae aur bit gae kitne hi sawan lekin

koi jazba koi baadal nahin garja mujh mein

saKHt-jaani pe meri karti hai duniya hairat

zindagi apna koi zahr hi bhar ja mujh mein

teri pairahan-e-alfaz se tazin karun

ai mere karb zara der Thahar ja mujh mein

ruh ka dasht hun sahra-e-taKHayyul hun main

har taraf ek udasi hai guzar ja mujh mein

ye sada-e-pas-e-anfas ka parda kab tak

tu kahin hai to taDap aur ubhar ja mujh mein

rang hun git hun naghma hun main KHushbu hun 'shakil'

zist hi zist hai bikhri hui har ja mujh mein