zat ki sair pe niklun meri himmat hi nahin

zaat kī sair pe niklūñ mirī himmat hī nahīñ

is bayābāñ se guzarne kī jasārat hī nahīñ

zindagī maiñ ne qanā.at kā hunar siikh liyā

ab tire naaz uThāne kī zarūrat hī nahīñ

koī shikva na shikāyat na sitam hai na jafā

ek muddat se tirī ham pe ināyat hī nahīñ

jab bhī milte haiñ chamak uThtī haiñ āñkheñ un kī

aur da.avā hai unheñ ham se mohabbat hī nahīñ

dil to kyā chiiz hai patthar bhī pighal jaa.e magar

jazba-e-ishq meñ tere vo harārat hī nahīñ

apne ashkoñ se banā dete bayābāñ ko chaman

kyā kareñ ham ko to rone kī ijāzat hī nahīñ

mo'atabar bhī vahī arbāb-e-nazar meñ Thahrī

jis kahānī meñ koī harf-e-sadāqat hī nahīñ

us kī yaad aa.ī hai mat chheḌ mujhe bād-e-sabā

tujh se phir baat karūñgī abhī fursat hī nahīñ

gulshan-e-dil pe ḳhizāoñ kā tasallut hai 'nigār'

koī ḳhvāhish koī armāñ koī chāhat hī nahīñ

zat ki sair pe niklun meri himmat hi nahin

is bayaban se guzarne ki jasarat hi nahin

zindagi main ne qanaat ka hunar sikh liya

ab tere naz uThane ki zarurat hi nahin

koi shikwa na shikayat na sitam hai na jafa

ek muddat se teri hum pe inayat hi nahin

jab bhi milte hain chamak uThti hain aankhen un ki

aur dawa hai unhen hum se mohabbat hi nahin

dil to kya chiz hai patthar bhi pighal jae magar

jazba-e-ishq mein tere wo hararat hi nahin

apne ashkon se bana dete bayaban ko chaman

kya karen hum ko to rone ki ijazat hi nahin

mo'atabar bhi wahi arbab-e-nazar mein Thahri

jis kahani mein koi harf-e-sadaqat hi nahin

us ki yaad aai hai mat chheD mujhe baad-e-saba

tujh se phir baat karungi abhi fursat hi nahin

gulshan-e-dil pe KHizaon ka tasallut hai 'nigar'

koi KHwahish koi arman koi chahat hi nahin