zat-o-sifat ka teri raaz ayan nihan bhi hai

zāt-o-sifāt kā tirī raaz ayaañ nihāñ bhī hai

dil meñ yaqīñ kī shakl hai aañkh meñ to gumāñ bhī hai

vaqt kī maslahat se kuchh maiñ huuñ ḳhamosh varna aaj

ḳhāma-ba-dast hī nahīñ muñh meñ mire zabāñ bhī hai

merā tajassus-e-havās mujh ko bañdhā rahā hai aas

jism ke is jahāñ se duur ruuh kā ik jahāñ bhī hai

jis meñ ġham-e-jahāñ faqat sūrat-e-yak-habāb hai

dil meñ vo terā jazb-e-shauq qulzum-e-be-karāñ bhī hai

vus.at-e-arsh-o-farsh meñ azm-o-amal se aadmī

simTe to ek zarra hai phaile to ik jahāñ bhī hai

'rāz' ba-ġhaur dekh tū sar se bashar ko paañv tak

sang bhī hai sharar bhī hai aag bhī hai dhuāñ bhī hai

zat-o-sifat ka teri raaz ayan nihan bhi hai

dil mein yaqin ki shakl hai aankh mein to guman bhi hai

waqt ki maslahat se kuchh main hun KHamosh warna aaj

KHama-ba-dast hi nahin munh mein mere zaban bhi hai

mera tajassus-e-hawas mujh ko bandha raha hai aas

jism ke is jahan se dur ruh ka ek jahan bhi hai

jis mein gham-e-jahan faqat surat-e-yak-habab hai

dil mein wo tera jazb-e-shauq qulzum-e-be-karan bhi hai

wusat-e-arsh-o-farsh mein azm-o-amal se aadmi

simTe to ek zarra hai phaile to ek jahan bhi hai

'raaz' ba-ghaur dekh tu sar se bashar ko panw tak

sang bhi hai sharar bhi hai aag bhi hai dhuan bhi hai