zawiya koi muqarrar nahin hone pata

zāviya koī muqarrar nahīñ hone paatā

dā.imī ek bhī manzar nahīñ hone paatā

umr-e-masrūf koī lamha-e-fursat ho atā

maiñ kabhī ḳhud ko mayassar nahīñ hone paatā

aa.e din ātish o aahan se guzartā hai magar

dil vo kāfir hai ki patthar nahīñ hone paatā

kyā use jabr-e-mashiyat kī ināyat samjhūñ

jo amal merā muqaddar nahīñ hone paatā

chashm-e-pur-āb samo letī hai ālām kī gard

aa.ina dil kā mukaddar nahīñ hone paatā

chādar-e-ijz ghaTā detī hai qāmat merā

maiñ kabhī apne barābar nahīñ hone paatā

fan ke kuchh aur bhī hote haiñ taqāze 'mohsin'

har suḳhan-go to suḳhan-var nahīñ hone paatā

zawiya koi muqarrar nahin hone pata

daimi ek bhi manzar nahin hone pata

umr-e-masruf koi lamha-e-fursat ho ata

main kabhi KHud ko mayassar nahin hone pata

aae din aatish o aahan se guzarta hai magar

dil wo kafir hai ki patthar nahin hone pata

kya use jabr-e-mashiyat ki inayat samjhun

jo amal mera muqaddar nahin hone pata

chashm-e-pur-ab samo leti hai aalam ki gard

aaina dil ka mukaddar nahin hone pata

chadar-e-ijz ghaTa deti hai qamat mera

main kabhi apne barabar nahin hone pata

fan ke kuchh aur bhi hote hain taqaze 'mohsin'

har suKHan-go to suKHan-war nahin hone pata