zaban-e-mai-kada mein jis ko mai-kash jam kahte hain

zabān-e-mai-kada meñ jis ko mai-kash jaam kahte haiñ

use ham apne dil kā dūsrā ik naam kahte haiñ

hadīs-e-zulf-o-ruḳh kyā haal sub.h-o-shām kahte haiñ

ġham-e-jānāñ ke parde meñ ġham-e-ayyām kahte haiñ

tabassum ne kahī thī dāstāñ āġhāz-e-ulfat kī

suno ab āñsuoñ se qissa-e-anjām kahte haiñ

tumhārī añkhḌiyoñ meñ hai sahar gangā ke sāhil kī

magar mai-ḳhvār us ko mai-kade kī shaam kahte haiñ

tirī zulf-e-siyah se ḳhāl-e-ruḳh kā jo bhī rishta ho

asīrān-e-mohabbat daana zer-e-dām kahte haiñ

tire dard-e-mohabbat ko zamāna ik maraz kah le

magar ham to ilāj-e-gardish-e-ayyām kahte haiñ

dil-e-afsurda ko 'ehsān' tum sham'-e-sahar kah lo

magar ahbāb to is ko charāġh-e-shām kahte haiñ

zaban-e-mai-kada mein jis ko mai-kash jam kahte hain

use hum apne dil ka dusra ek nam kahte hain

hadis-e-zulf-o-ruKH kya haal subh-o-sham kahte hain

gham-e-jaanan ke parde mein gham-e-ayyam kahte hain

tabassum ne kahi thi dastan aaghaz-e-ulfat ki

suno ab aansuon se qissa-e-anjam kahte hain

tumhaari ankhDiyon mein hai sahar ganga ke sahil ki

magar mai-KHwar us ko mai-kade ki sham kahte hain

teri zulf-e-siyah se KHal-e-ruKH ka jo bhi rishta ho

asiran-e-mohabbat dana zer-e-dam kahte hain

tere dard-e-mohabbat ko zamana ek maraz kah le

magar hum to ilaj-e-gardish-e-ayyam kahte hain

dil-e-afsurda ko 'ehsan' tum sham'-e-sahar kah lo

magar ahbab to is ko charagh-e-sham kahte hain