zaban ka pas hai to qaul sab nibhane hain

zabāñ kā paas hai to qaul sab nibhāne haiñ

agar mukarne pe aa.uuñ to sau bahāne haiñ

tīr-e-nigāh ke raste sabhī na.e haiñ magar

hamāre taur-tarīqe sabhī parā.e haiñ

na raas aa.ī hameñ aap kī adā koī

sitam hai us pe ki ham aap ke divāne haiñ

ye kyā ki hausla tum ne abhī se haar diyā

abhī to vaqt ne kuchh aur gul khilāne haiñ

siyāh-rāt kī tārīkiyāñ bajā lekin

navelī sub.h ke manzar 'ajab suhāne haiñ

har ek samt balāoñ kā ik hujūm sā hai

tamām hausle ab dil ko āzmāne haiñ

nayā to kuchh bhī nahīñ terī dāstāñ meñ 'chāñd'

vahī haiñ dard ke qisse vahī fasāne haiñ

zaban ka pas hai to qaul sab nibhane hain

agar mukarne pe aaun to sau bahane hain

tir-e-nigah ke raste sabhi nae hain magar

hamare taur-tariqe sabhi parae hain

na ras aai hamein aap ki ada koi

sitam hai us pe ki hum aap ke diwane hain

ye kya ki hausla tum ne abhi se haar diya

abhi to waqt ne kuchh aur gul khilane hain

siyah-raat ki tarikiyan baja lekin

naweli subh ke manzar 'ajab suhane hain

har ek samt balaon ka ek hujum sa hai

tamam hausle ab dil ko aazmane hain

naya to kuchh bhi nahin teri dastan mein 'chand'

wahi hain dard ke qisse wahi fasane hain