zaban kaTi so kaTi bahs muKHtasar to hui

zabāñ kaTī so kaTī bahs muḳhtasar to huī

jo baat maiñ ne kahī thī vo mo'atabar to huī

ye din to raat meñ Dhaltā nazar nahīñ aatā

bhalī thī shab ki guzar to ga.ī sahar to huī

girī fasīl jo zindāñ kī sar bahut phūTe

machā to shor magar ḳhalq ko ḳhabar to huī

muqāble meñ udhar teġh thī idhar gardan

maiñ suraḳh-rū huuñ ki tafrīq-e-ḳhair-o-shar to huī

harīf ho ga.e qurbāñ matā.a-e-duniyā par

unheñ bhī jaañ se koī shai azīz-tar to huī

zaban kaTi so kaTi bahs muKHtasar to hui

jo baat main ne kahi thi wo mo'atabar to hui

ye din to raat mein Dhalta nazar nahin aata

bhali thi shab ki guzar to gai sahar to hui

giri fasil jo zindan ki sar bahut phuTe

macha to shor magar KHalq ko KHabar to hui

muqable mein udhar tegh thi idhar gardan

main suraKH-ru hun ki tafriq-e-KHair-o-shar to hui

harif ho gae qurban mataa-e-duniya par

unhen bhi jaan se koi shai aziz-tar to hui