zaban KHamosh-o-nazar be-qarar hai ab tak

zabāñ ḳhamosh-o-nazar be-qarār hai ab tak

chalā bhī aa ki tirā intizār hai ab tak

ye sab numūd-o-numā.ish hai ḳhaas tere liye

tire liye hī chaman meñ bahār hai ab tak

nafas nafas meñ hai be-tāb aarzū terī

nazar nazar ko tirā intizār hai ab tak

tirī jafāoñ se har qalb ho chukā nālāñ

zahe vo dil ki jo tujh par nisār hai ab tak

nahīñ kisī ko kisī par jo iḳhtiyār na ho

tujhe to dil pe mire iḳhtiyār hai ab tak

asar ḳhizāñ kā har ik shai se ho chukā zāhir

bahār-e-husn pe husn-e-bahār hai ab tak

zabān-e-ġhair tire raaz faash kartī hai

mirī nigāh magar parda-dār hai ab tak

chaman-tarāz-e-mohabbat hai dil kī gul-kārī

ravish-ravish mire ḳhuuñ kī bahār hai ab tak

tirī zabāñ ne jo va.ade kiye vafā na kiye

tirī zabāñ kā magar e.atibār hai ab tak

tumhāre ġham meñ use lutf kuchh milā aisā

hamāre dil ko ḳhushī nāgavār hai ab tak

diloñ meñ yaad tirī chuTkiyāñ sī letī hai

zabāñ pe zikr tirā baar baar hai ab tak

shahīd-e-nāz huiiñ kitnī bulbuleñ afsos

bahār apnī jagah pur-bahār hai ab tak

ye jāntā to maiñ yuuñ us ko dekhtā na 'junūñ'

mirī nigāh se vo sharm-sār hai ab tak

zaban KHamosh-o-nazar be-qarar hai ab tak

chala bhi aa ki tera intizar hai ab tak

ye sab numud-o-numaish hai KHas tere liye

tere liye hi chaman mein bahaar hai ab tak

nafas nafas mein hai be-tab aarzu teri

nazar nazar ko tera intizar hai ab tak

teri jafaon se har qalb ho chuka nalan

zahe wo dil ki jo tujh par nisar hai ab tak

nahin kisi ko kisi par jo iKHtiyar na ho

tujhe to dil pe mere iKHtiyar hai ab tak

asar KHizan ka har ek shai se ho chuka zahir

bahaar-e-husn pe husn-e-bahaar hai ab tak

zaban-e-ghair tere raaz fash karti hai

meri nigah magar parda-dar hai ab tak

chaman-taraaz-e-mohabbat hai dil ki gul-kari

rawish-rawish mere KHun ki bahaar hai ab tak

teri zaban ne jo wade kiye wafa na kiye

teri zaban ka magar eatibar hai ab tak

tumhaare gham mein use lutf kuchh mila aisa

hamare dil ko KHushi nagawar hai ab tak

dilon mein yaad teri chuTkiyan si leti hai

zaban pe zikr tera bar bar hai ab tak

shahid-e-naz huin kitni bulbulen afsos

bahaar apni jagah pur-bahaar hai ab tak

ye jaanta to main yun us ko dekhta na 'junun'

meri nigah se wo sharm-sar hai ab tak