zaban KHamosh rahe tark-e-muddaa na kare

zabāñ ḳhamosh rahe tark-e-mudda.ā na kare

ye iltijā bhī nahīñ kam ki iltijā na kare

maiñ nañg-e-ishq samajhtā huuñ zindagī ke liye

vo dil jo gardish-e-daurāñ kā sāmnā na kare

dilā rahī hai yaqīn-e-vafā mujhe vo nazar

ye baat aur hai har ek se vafā na kare

use bahār kī rañgīniyāñ nasīb na hoñ

chaman meñ rah ke chaman kā jo haq adā na kare

kabhī kabhī ye binā-e-karam bhī hotī hai

jafā-e-yār se andāza-e-jafā na kare

musībatoñ se nikhartā hai ishq ai 'shā.ir'

duā ko haath bhī uTh jaa.eñ to duā na kare

zaban KHamosh rahe tark-e-muddaa na kare

ye iltija bhi nahin kam ki iltija na kare

main nang-e-ishq samajhta hun zindagi ke liye

wo dil jo gardish-e-dauran ka samna na kare

dila rahi hai yaqin-e-wafa mujhe wo nazar

ye baat aur hai har ek se wafa na kare

use bahaar ki ranginiyan nasib na hon

chaman mein rah ke chaman ka jo haq ada na kare

kabhi kabhi ye bina-e-karam bhi hoti hai

jafa-e-yar se andaza-e-jafa na kare

musibaton se nikharta hai ishq ai 'shair'

dua ko hath bhi uTh jaen to dua na kare