zaban par aarzu ki baat lana saKHt mushkil hai

zabāñ par aarzū kī baat laanā saḳht mushkil hai

magar rāz-e-mohabbat kā chhupānā saḳht mushkil hai

yahī ā.īn-e-ulfat hai yahī zauq-e-vafā-koshī

agarche zaḳhm khā kar muskurānā saḳht mushkil hai

usī manzil kī jānib baḌh rahā hai har qadam apnā

jidhar ik ik qadam aage baḌhānā saḳht mushkil hai

hameñ le jā rahā hai iztirāb-e-shauq us dar par

jahāñ sunte haiñ qismat āzmānā saḳht mushkil hai

jalā.eñge charāġh-e-ārzū tārīkī-e-ġham meñ

ye kuchh āsāñ nahīñ hai ham ne maanā saḳht mushkil hai

tire har nāravā jaur-o-sitam ko bhuul saktā huuñ

tirī shān-e-karam ko bhuul jaanā saḳht mushkil hai

‘umūman muskurātā huuñ 'jamālī' jhuum jaatā huuñ

ki jis 'ālam meñ aksar muskurānā saḳht mushkil hai

zaban par aarzu ki baat lana saKHt mushkil hai

magar raaz-e-mohabbat ka chhupana saKHt mushkil hai

yahi aain-e-ulfat hai yahi zauq-e-wafa-koshi

agarche zaKHm kha kar muskurana saKHt mushkil hai

usi manzil ki jaanib baDh raha hai har qadam apna

jidhar ek ek qadam aage baDhana saKHt mushkil hai

hamein le ja raha hai iztirab-e-shauq us dar par

jahan sunte hain qismat aazmana saKHt mushkil hai

jalaenge charagh-e-arzu tariki-e-gham mein

ye kuchh aasan nahin hai hum ne mana saKHt mushkil hai

tere har narawa jaur-o-sitam ko bhul sakta hun

teri shan-e-karam ko bhul jaana saKHt mushkil hai

‘umuman muskuraata hun 'jamali' jhum jata hun

ki jis 'alam mein aksar muskurana saKHt mushkil hai