زباں پر اصل میں کب درد و غم کی داستاں آئی

زباں پر اصل میں کب درد و غم کی داستاں آئی

خیال شکوہ آتے ہی محبت درمیاں آئی

نیاز عشق ناز حسن ہی کا ایک پرتو ہے

تمہیں یہ راز سمجھانے کی نوبت ہی کہاں آئی

جسے احساس تک ہوتا نہیں ویرانیٔ دل کا

وہ چشم خود نما میری کہاں سے راز داں آئی

حضور دوست کوئی شکوۂ بے جا تو کیا معنی

حدیث شکر بن کر آئی جب لب تک فغاں آئی

یہ مانا حسن و الفت لازم و ملزوم ہیں دونوں

مگر اب تک سمجھ میں کچھ نہ وجہ امتحاں آئی

بہت تھا ناز ہم کو اہتمام دیدہ و دل پر

نگاہ فتنہ زا پردے سے باہر ناگہاں آئی

وفا راہ حقیقت ہے مگر اب اس کو کیا کہئے

قدم آگے بڑھاتے ہیں حد وہم و گماں آئی

جسے تنہا دل مجبور بھی محسوس کرتا ہے

کچھ ایسی گفتگو بھی میرے ان کے درمیاں آئی

خیال ترک الفت دل میں آنے ہی کو تھا نخشبؔ

سلام آخری کرنے حیات جاوداں آئی