zaban par asl mein kab dard-o-gham ki dastan aai

zabāñ par asl meñ kab dard-o-ġham kī dāstāñ aa.ī

ḳhayāl-e-shikva aate hī mohabbat darmiyāñ aa.ī

niyāz-e-ishq nāz-e-husn hī kā ek partav hai

tumheñ ye raaz samjhāne kī naubat hī kahāñ aa.ī

jise ehsās tak hotā nahīñ vīrāni-e-dil kā

vo chashm-e-ḳhud-numā merī kahāñ se rāzdāñ aa.ī

huzūr-e-dost koī shikva-e-bejā to kyā ma.anī

hadīs-e-shukr ban kar aa.ī jab lab tak fuġhāñ aa.ī

ye maanā husn-o-ulfat lāzim-o-malzūm haiñ donoñ

magar ab tak samajh meñ kuchh na vajah-e-imtihāñ aa.ī

bahut thā naaz ham ko ehtimām-e-dīda-o-dil par

nigāh-e-fitna-zā parde se bāhar nā-gahāñ aa.ī

vafā rāh-e-haqīqat hai magar ab is ko kyā kahiye

qadam aage baḌhāte haiñ had-e-vahm-o-gumāñ aa.ī

jise tanhā dil-e-majbūr bhī mahsūs kartā hai

kuchh aisī guftugū bhī mere un ke darmiyāñ aa.ī

ḳhayāl-e-tark-e-ulfat dil meñ aane hī ko thā 'naḳhshab'

salām-e-āḳhirī karne hayāt-e-jāvidāñ aa.ī

zaban par asl mein kab dard-o-gham ki dastan aai

KHayal-e-shikwa aate hi mohabbat darmiyan aai

niyaz-e-ishq naz-e-husn hi ka ek partaw hai

tumhein ye raaz samjhane ki naubat hi kahan aai

jise ehsas tak hota nahin virani-e-dil ka

wo chashm-e-KHud-numa meri kahan se raazdan aai

huzur-e-dost koi shikwa-e-beja to kya mani

hadis-e-shukr ban kar aai jab lab tak fughan aai

ye mana husn-o-ulfat lazim-o-malzum hain donon

magar ab tak samajh mein kuchh na wajah-e-imtihan aai

bahut tha naz hum ko ehtimam-e-dida-o-dil par

nigah-e-fitna-za parde se bahar na-gahan aai

wafa rah-e-haqiqat hai magar ab is ko kya kahiye

qadam aage baDhate hain had-e-wahm-o-guman aai

jise tanha dil-e-majbur bhi mahsus karta hai

kuchh aisi guftugu bhi mere un ke darmiyan aai

KHayal-e-tark-e-ulfat dil mein aane hi ko tha 'naKHshab'

salam-e-aKHiri karne hayat-e-jawidan aai