zaban pe nala-o-fariyaad ke siwa kya hai

zabān pe nāla-o-fariyād ke sivā kyā hai

hamāre dil meñ tirī yaad ke sivā kyā hai

udhar to rañg hai mastī hai shādmānī hai

idhar bas ik dil-e-nāshād ke sivā kyā hai

jo dekhiye to udhar sau jahān haiñ ābād

idhar ik ālam-e-barbād ke sivā kyā hai

ḳhizāñ kī fikr na ab intizār-e-fasl-e-bahār

chaman meñ shikva-e-sayyād ke sivā kyā hai

hai ek zaat pe īmān aur yaqīñ markūz

sab aur kufr ke ilhād ke sivā kyā hai

hamārā nām-o-nasab pūchhne se kyā hāsil

misāl-e-āba-o-ajdād ke sivā kyā hai

ye aarzū hai ki ta.amīr ho makāñ 'rizvān'

abhī zamīn pe buniyād ke sivā kyā hai

zaban pe nala-o-fariyaad ke siwa kya hai

hamare dil mein teri yaad ke siwa kya hai

udhar to rang hai masti hai shadmani hai

idhar bas ek dil-e-nashad ke siwa kya hai

jo dekhiye to udhar sau jahan hain aabaad

idhar ek aalam-e-barbaad ke siwa kya hai

KHizan ki fikr na ab intizar-e-fasl-e-bahaar

chaman mein shikwa-e-sayyaad ke siwa kya hai

hai ek zat pe iman aur yaqin markuz

sab aur kufr ke ilhad ke siwa kya hai

hamara nam-o-nasab puchhne se kya hasil

misal-e-aba-o-ajdad ke siwa kya hai

ye aarzu hai ki tamir ho makan 'rizwan'

abhi zamin pe buniyaad ke siwa kya hai