zabanen zahr uglen aur qalam tirshul ho jaen

zabāneñ zahr ugleñ aur qalam tirshūl ho jaa.eñ

phir is āb-o-havā meñ kis tarah ham phuul ho jaa.eñ

bhañveñ talvār meñ palkeñ badal jā.eñgī ḳhanjar meñ

ye satreñ mā-badaulat ko agar mausūl ho jaa.eñ

bhalā kyā fā.eda aise ḳhudāoñ kī parastish kā

jinheñ ye bhī nahīñ mā'lūm kab mā'zūl ho jaa.eñ

hai majbūrī vo phūloñ ko kaheñ kāñTe baġhair is ke

nahīñ mumkin ki dasht-e-ḳhār meñ maqbūl ho jaa.eñ

ye terī nāz-bardārī na ham se hogī ai duniyā

nahīñ vo ham jo kūche meñ kisī ke dhuul ho jaa.eñ

nazar aa.eñ tumhārī tarh har ik roz manzar par

zarā sā ham bhī ai pyāre jo nā-mā'qūl ho jaa.eñ

pate kī baat kah duuñ ye faqīroñ kī adā.eñ haiñ

kabhī mā'rūf ho jaa.eñ kabhī maj.hūl ho jaa.eñ

'nazīr' aise meñ ab koī gavāhī kaise mumkin ho

jo qātil ko kaheñ qātil vahī maqtūl ho jaa.eñ

zabanen zahr uglen aur qalam tirshul ho jaen

phir is aab-o-hawa mein kis tarah hum phul ho jaen

bhanwen talwar mein palken badal jaengi KHanjar mein

ye satren ma-badaulat ko agar mausul ho jaen

bhala kya faeda aise KHudaon ki parastish ka

jinhen ye bhi nahin ma'lum kab ma'zul ho jaen

hai majburi wo phulon ko kahen kanTe baghair is ke

nahin mumkin ki dasht-e-KHar mein maqbul ho jaen

ye teri naz-bardari na hum se hogi ai duniya

nahin wo hum jo kuche mein kisi ke dhul ho jaen

nazar aaen tumhaari tarh har ek roz manzar par

zara sa hum bhi ai pyare jo na-ma'qul ho jaen

pate ki baat kah dun ye faqiron ki adaen hain

kabhi ma'ruf ho jaen kabhi majhul ho jaen

'nazir' aise mein ab koi gawahi kaise mumkin ho

jo qatil ko kahen qatil wahi maqtul ho jaen