zabt bhi chahiye zarf bhi chahiye aur mohtat pas-e-wafa chahiye

zabt bhī chāhiye zarf bhī chāhiye aur mohtāt pās-e-vafā chāhiye

zindagī dushmanoñ meñ bhī mushkil nahīñ aadmī meñ zarā hausla chāhiye

ham ko manzil-shanāsī pe bhī naaz hai aur ham āshnā-e-havādis bhī haiñ

jū-e-ḳhūñ se guzarnā paḌe bhī to kyā justujū ko to ik rāstā chāhiye

apne māthe pe bal Daal kar hameñ shīsh-mahloñ ke andar se jhiḌkī na do

ham bhikārī nahīñ haiñ ki Tal jā.eñge ham ko apnī vafā kā sila chāhiye

tum ne ārā.ish-e-gulsitāñ ke liye ham se kuchh ḳhuun māñgā thā muddat huī

tum se ḳhairāt to ham nahīñ māñgte ham ko is ḳhuun kā ḳhūñ-bahā chāhiye

ham ko har moḌ par dost milte rahe ham kabhī rāh-e-manzil meñ tanhā na the

kal ġham-e-dost thā ab ġham-e-zīst hai āshnā ko to ik āshnā chāhiye

merī maano to ik baat tum se kahūñ ye nayā daur hai is kā kyā Thiik hai

dostoñ se milo mahfiloñ meñ magar āstīnoñ kā bhī jā.eza chāhiye

had se baḌh kar mohabbat munāsib nahīñ is meñ andesha-e-bad-gumānī bhī hai

dushmanoñ se ta'alluq to hai hī ġhalat dostoñ meñ bhī kuchh fāsla chāhiye

jurm-e-be-bāk-goī kī pādāsh meñ zahr 'iqbāl' ko talḳhiyoñ kā milā

us ne is zahr ko hī suḳhan kar liyā is zamāne meñ ab aur kyā chāhiye

zabt bhi chahiye zarf bhi chahiye aur mohtat pas-e-wafa chahiye

zindagi dushmanon mein bhi mushkil nahin aadmi mein zara hausla chahiye

hum ko manzil-shanasi pe bhi naz hai aur hum aashna-e-hawadis bhi hain

ju-e-KHun se guzarna paDe bhi to kya justuju ko to ek rasta chahiye

apne mathe pe bal Dal kar hamein shish-mahlon ke andar se jhiDki na do

hum bhikari nahin hain ki Tal jaenge hum ko apni wafa ka sila chahiye

tum ne aaraish-e-gulsitan ke liye hum se kuchh KHun manga tha muddat hui

tum se KHairaat to hum nahin mangte hum ko is KHun ka KHun-baha chahiye

hum ko har moD par dost milte rahe hum kabhi rah-e-manzil mein tanha na the

kal gham-e-dost tha ab gham-e-zist hai aashna ko to ek aashna chahiye

meri mano to ek baat tum se kahun ye naya daur hai is ka kya Thik hai

doston se milo mahfilon mein magar aastinon ka bhi jaeza chahiye

had se baDh kar mohabbat munasib nahin is mein andesha-e-bad-gumani bhi hai

dushmanon se ta'alluq to hai hi ghalat doston mein bhi kuchh fasla chahiye

jurm-e-be-bak-goi ki padash mein zahr 'iqbaal' ko talKHiyon ka mila

us ne is zahr ko hi suKHan kar liya is zamane mein ab aur kya chahiye