ضبط آلام ہے اب دل کو گوارا اے دوست

ضبط آلام ہے اب دل کو گوارا اے دوست

اک تو ہی کیا ہے ترا غم بھی ہے پیارا اے دوست

تو اسیر غم دشمن ہے تو کیا غم مجھ کو

مجھ کو کافی ہے ترے غم کا سہارا اے دوست

کیسے طوفان بلا خیز کی زد سے نکلوں

ناؤ منجدھار میں اور دور کنارا اے دوست

ہے مری فطرت خاموش مرے دل کی رفیق

اب نہیں نالہ و فریاد کا یارا اے دوست

یاد ایام کہ تھی حسرت دیدار مجھے

جانے کیوں اب ہے ترا ہجر گوارا اے دوست

وہ بھی دن تھے کہ چمکتا تھا مثال خورشید

ماند ہے اب مری قسمت کا ستارا اے دوست

غیر کو تو نے عطا کی خلش تیر نگاہ

اور مجھ کو فقط ابرو کا اشارا اے دوست

ہائے وہ دن کہ ہوئی تجھ سے ملاقات نصیب

وائے یہ دن کہ ہوں محروم‌ نظارا اے دوست