zabt-e-alam hai ab dil ko gawara ai dost

zabt-e-ālām hai ab dil ko gavārā ai dost

ik tū hī kyā hai tirā ġham bhī hai pyārā ai dost

tū asīr-e-ġham-e-dushman hai to kyā ġham mujh ko

mujh ko kaafī hai tire ġham kā sahārā ai dost

kaise tūfān-e-balā-ḳhez kī zad se niklūñ

naav mañjdhār meñ aur duur kinārā ai dost

hai mirī fitrat-e-ḳhāmosh mire dil kī rafīq

ab nahīñ nāla-o-fariyād kā yaarā ai dost

yād-e-ayyām ki thī hasrat-e-dīdār mujhe

jaane kyoñ ab hai tirā hijr gavārā ai dost

vo bhī din the ki chamaktā thā misāl-e-ḳhurshīd

maañd hai ab mirī qismat kā sitārā ai dost

ġhair ko tū ne atā kī ḳhalish-e-tīr-e-nigāh

aur mujh ko faqat abrū kā ishārā ai dost

haa.e vo din ki huī tujh se mulāqāt nasīb

vaa.e ye din ki huuñ mahrūm-e-nazārā ai dost

zabt-e-alam hai ab dil ko gawara ai dost

ek tu hi kya hai tera gham bhi hai pyara ai dost

tu asir-e-gham-e-dushman hai to kya gham mujh ko

mujh ko kafi hai tere gham ka sahaara ai dost

kaise tufan-e-bala-KHez ki zad se niklun

naw manjdhaar mein aur dur kinara ai dost

hai meri fitrat-e-KHamosh mere dil ki rafiq

ab nahin nala-o-fariyaad ka yara ai dost

yaad-e-ayyam ki thi hasrat-e-didar mujhe

jaane kyon ab hai tera hijr gawara ai dost

wo bhi din the ki chamakta tha misal-e-KHurshid

mand hai ab meri qismat ka sitara ai dost

ghair ko tu ne ata ki KHalish-e-tir-e-nigah

aur mujh ko faqat abru ka ishaara ai dost

hae wo din ki hui tujh se mulaqat nasib

wae ye din ki hun mahrum-e-nazara ai dost