zabt-e-gham se lakh apni jaan par ban aae hai

zabt-e-ġham se laakh apnī jaan par ban aa.e hai

haañ magar ye izzat-e-sādāt to rah jaa.e hai

ham unhīñ ahl-e-vafā ke chāhne vāloñ meñ haiñ

āsmāñ jin ke liye sadiyoñ lahū barsā.e hai

kyā ḳhudā kī shaan hai is daur kā insān bhī

ik zarā muḳhtār hote hī ḳhudā ban jaa.e hai

hausle ke saath ham nikle to haiñ ghar se magar

dekhiye ye rāsta kis āstāñ tak jaa.e hai

ye shu.ūr-e-tishnagī hai yā ġhurūr-e-tishnagī

tishna-lab dariyā pe jā ke tishna-lab lauT aa.e hai

shān-e-hairat hai ki jis ko sang kah dete haiñ log

phir vahī dil TūTne par aa.ina kahlā.e hai

zabt-e-gham se lakh apni jaan par ban aae hai

han magar ye izzat-e-sadat to rah jae hai

hum unhin ahl-e-wafa ke chahne walon mein hain

aasman jin ke liye sadiyon lahu barsae hai

kya KHuda ki shan hai is daur ka insan bhi

ek zara muKHtar hote hi KHuda ban jae hai

hausle ke sath hum nikle to hain ghar se magar

dekhiye ye rasta kis aastan tak jae hai

ye shuur-e-tishnagi hai ya ghurur-e-tishnagi

tishna-lab dariya pe ja ke tishna-lab lauT aae hai

shan-e-hairat hai ki jis ko sang kah dete hain log

phir wahi dil TuTne par aaina kahlae hai