ضبط غم سے لاکھ اپنی جان پر بن آئے ہے

ضبط غم سے لاکھ اپنی جان پر بن آئے ہے

ہاں مگر یہ عزت سادات تو رہ جائے ہے

ہم انہیں اہل وفا کے چاہنے والوں میں ہیں

آسماں جن کے لئے صدیوں لہو برسائے ہے

کیا خدا کی شان ہے اس دور کا انسان بھی

اک ذرا مختار ہوتے ہی خدا بن جائے ہے

حوصلے کے ساتھ ہم نکلے تو ہیں گھر سے مگر

دیکھیے یہ راستہ کس آستاں تک جائے ہے

یہ شعور تشنگی ہے یا غرور تشنگی

تشنہ لب دریا پہ جا کے تشنہ لب لوٹ آئے ہے

شان حیرت ہے کہ جس کو سنگ کہہ دیتے ہیں لوگ

پھر وہی دل ٹوٹنے پر آئنہ کہلائے ہے