zabt-e-girya mein bhi girya to kiya hai maine

zabt-e-girya meñ bhī girya to kiyā hai maiñ ne

chup rahā huuñ pa tamāshā to kiyā hai maiñ ne

ab uḌā.ūñgā use tere falak par ik din

apnī miTTī ko ikaTThā to kiyā hai maiñ ne

dekhiye kis ke ḳhad-o-ḳhāl nazar aate haiñ

ek dīvār ko shīsha to kiyā hai maiñ ne

ab maiñ kuchh aur banūñ aisī bayābānī meñ

TuuT jaane kā irāda to kiyā hai maiñ ne

khul ke maiñ vasl kī bāteñ nahīñ kartā phir bhī

bātoñ bātoñ meñ taqāzā to kiyā hai maiñ ne

pyaar kī had hī nahīñ koī ye maanā lekin

jitnā ho saktā hai utnā to kiyā hai maiñ ne

shāyad aa jaa.e ḳhabar apne alāva huuñ kahāñ

ḳhud ko tanhā.ī meñ tanhā to kiyā hai maiñ ne

mujh meñ tashkīk bhī sar apnā uThā saktī hai

ai ḳhudā tujh pe bharosa to kiyā hai maiñ ne

jaane ab kaun galī meñ kahīñ niklūñ jā kar

ek vīrāne meñ rasta to kiyā hai maiñ ne

vo kahīñ hai ki nahīñ hai mujhe ma.alūm nahīñ

apne hone kā ishāra to kiyā hai maiñ ne

ab faqat āḳhirī ishq āḳhirī maqsūd-'vafā'

āḳhirī ishq ki pahlā to kiyā hai maiñ ne

zabt-e-girya mein bhi girya to kiya hai main ne

chup raha hun pa tamasha to kiya hai main ne

ab uDaunga use tere falak par ek din

apni miTTi ko ikaTTha to kiya hai main ne

dekhiye kis ke KHad-o-KHal nazar aate hain

ek diwar ko shisha to kiya hai main ne

ab main kuchh aur banun aisi bayabani mein

TuT jaane ka irada to kiya hai main ne

khul ke main wasl ki baaten nahin karta phir bhi

baaton baaton mein taqaza to kiya hai main ne

pyar ki had hi nahin koi ye mana lekin

jitna ho sakta hai utna to kiya hai main ne

shayad aa jae KHabar apne alawa hun kahan

KHud ko tanhai mein tanha to kiya hai main ne

mujh mein tashkik bhi sar apna uTha sakti hai

ai KHuda tujh pe bharosa to kiya hai main ne

jaane ab kaun gali mein kahin niklun ja kar

ek virane mein rasta to kiya hai main ne

wo kahin hai ki nahin hai mujhe malum nahin

apne hone ka ishaara to kiya hai main ne

ab faqat aaKHiri ishq aaKHiri maqsud-'wafa'

aaKHiri ishq ki pahla to kiya hai main ne