zabt-e-nawak-e-gham se baat ban to sakti hai

zabt-e-nāvak-e-ġham se baat ban to saktī hai

aadmī kī uñglī meñ phāñs bhī khaTaktī hai

kyā kisī navāzish kī poll khol dī maiñ ne

aañkh jheñptī kyuuñ hai kyuuñ zabāñ bahaktī hai

ham-qafas nasīboñ se gulsitāñ kā kyā rishta

jis tarah koī Daalī TuuT kar laTaktī hai

sāthiyo thake-māñde hārte ho himmat kyuuñ

duur se koī manzil din meñ kab chamaktī hai

kaam azm-o-himmat se insirām paate haiñ

kāhilī kī mat suniye kāhilī to biktī hai

jis ko nik.hat-o-gul se vāsta nahīñ hotā

ḳhush-libās phūloñ meñ vo nazar bahaktī hai

'shād' in añdheroñ meñ kahkashāñ kī manzil se

raat ke guzarne kī sub.h raah taktī hai

zabt-e-nawak-e-gham se baat ban to sakti hai

aadmi ki ungli mein phans bhi khaTakti hai

kya kisi nawazish ki poll khol di main ne

aankh jhenpti kyun hai kyun zaban bahakti hai

ham-qafas nasibon se gulsitan ka kya rishta

jis tarah koi Dali TuT kar laTakti hai

sathiyo thake-mande haarte ho himmat kyun

dur se koi manzil din mein kab chamakti hai

kaam azm-o-himmat se insiram pate hain

kahili ki mat suniye kahili to bikti hai

jis ko nikhat-o-gul se wasta nahin hota

KHush-libas phulon mein wo nazar bahakti hai

'shad' in andheron mein kahkashan ki manzil se

raat ke guzarne ki subh rah takti hai