zabt honTon pe aa gaya to phir

zabt hoñToñ pe aa gayā to phir

terā sab hausla gayā to phir

sāl-hā-sāl kā akelā-pan

tujh ko andar se khā gayā to phir

merī tanhā.ī kā ye sannāTā

har taraf gūñjtā gayā to phir

vo jo ta.abīr ban ke aayā hai

ḳhvāb saare jalā gayā to phir

har taraf ye safed sūnā-pan

manzaroñ ko jalā gayā to phir

jhiil āñkheñ sarāhne vaalā

in ko dariyā banā gayā to phir

apne sab lafz de diye us ko

ab vahī boltā gayā to phir

is ke lahje kā rañg agar 'nāhīd'

tere lahje pe chhā gayā to phir

zabt honTon pe aa gaya to phir

tera sab hausla gaya to phir

sal-ha-sal ka akela-pan

tujh ko andar se kha gaya to phir

meri tanhai ka ye sannaTa

har taraf gunjta gaya to phir

wo jo tabir ban ke aaya hai

KHwab sare jala gaya to phir

har taraf ye safed suna-pan

manzaron ko jala gaya to phir

jhil aankhen sarahne wala

in ko dariya bana gaya to phir

apne sab lafz de diye us ko

ab wahi bolta gaya to phir

is ke lahje ka rang agar 'nahid'

tere lahje pe chha gaya to phir