zabt karna na kabhi zabt mein wahshat karna

zabt karnā na kabhī zabt meñ vahshat karnā

itnā āsāñ bhī nahīñ tujh se mohabbat karnā

tujh se kahne kī koī baat na karnā tujh se

kunj-e-tanhā.ī meñ bas ḳhud ko alāmat karnā

ik bagūle kī tarah DhūñDte phirnā tujh ko

rū-ba-rū ho to na shikva na shikāyat karnā

ham gadāyān-e-vafā jānte haiñ ai dar-e-husn

umr bhar kār-e-nadāmat pe nadāmat karnā

ai asīr-e-qafas sahr-e-anā dekh aa kar

kitnā mushkil hai tire shahr se hijrat karnā

phir vahī ḳhār-e-muġhīlāñ vahī vīrāna hai

ai kaf-e-pā-e-junūñ phir vahī zahmat karnā

sūrat māh-e-munīr ab ke sar-e-bām aa kar

ham ġharīboñ ko bhī kuchh ranj ināyat karnā

jamā karnā tah-e-mizhgāñ tujhe qatra qatra

raat bhar phir tujhe TukḌoñ meñ rivāyat karnā

kaam aisā koī mushkil to nahīñ hai 'ḳhāvar'

magar ik dast-e-hinā-rañg pe bai.at karnā

zabt karna na kabhi zabt mein wahshat karna

itna aasan bhi nahin tujh se mohabbat karna

tujh se kahne ki koi baat na karna tujh se

kunj-e-tanhai mein bas KHud ko alamat karna

ek bagule ki tarah DhunDte phirna tujh ko

ru-ba-ru ho to na shikwa na shikayat karna

hum gadayan-e-wafa jaante hain ai dar-e-husn

umr bhar kar-e-nadamat pe nadamat karna

ai asir-e-qafas sahr-e-ana dekh aa kar

kitna mushkil hai tere shahr se hijrat karna

phir wahi KHar-e-mughilan wahi virana hai

ai kaf-e-pa-e-junun phir wahi zahmat karna

surat mah-e-munir ab ke sar-e-baam aa kar

hum gharibon ko bhi kuchh ranj inayat karna

jama karna tah-e-mizhgan tujhe qatra qatra

raat bhar phir tujhe TukDon mein riwayat karna

kaam aisa koi mushkil to nahin hai 'KHawar'

magar ek dast-e-hina-rang pe baiat karna