ضبط کی ہار دل زار نہ ہونے پائے

ضبط کی ہار دل زار نہ ہونے پائے

دیکھ رسوا ترا کردار نہ ہونے پائے

باغباں یہ بھی ہے تزئین چمن کا حصہ

گل کے پہلو سے جدا خار نہ ہونے پائے

بات خود کرتے ہیں تکرار کی اس پر یہ ستم

خود ہی کہتے ہیں کہ تکرار نہ ہونے پائے

رند چونکیں گے تو میخانے کی پھر خیر نہیں

دیکھ ساقی کوئی ہشیار نہ ہونے پائے

اے نسیم سحری اور ذرا آہستہ

حسن خوابیدہ ہے بیدار نہ ہونے پائے

ان کے جلوؤں میں اس انداز کی تابانی ہے

سامنے آئیں تو دیدار نہ ہونے پائے

ہے محبت میں یہی شرط محبت ذاکرؔ

رنج ہو رنج کا اظہار نہ ہونے پائے