zabt ki haar dil-e-zar na hone pae

zabt kī haar dil-e-zār na hone paa.e

dekh rusvā tirā kirdār na hone paa.e

bāġhbāñ ye bhī hai taz.īn-e-chaman kā hissa

gul ke pahlū se judā ḳhaar na hone paa.e

baat ḳhud karte haiñ takrār kī us par ye sitam

ḳhud hī kahte haiñ ki takrār na hone paa.e

rind chauñkeñge to maiḳhāne kī phir ḳhair nahīñ

dekh saaqī koī hushiyār na hone paa.e

ai nasīm-e-saharī aur zarā āhista

husn ḳhvābīda hai bedār na hone paa.e

un ke jalvoñ meñ is andāz kī tābānī hai

sāmne aa.eñ to dīdār na hone paa.e

hai mohabbat meñ yahī shart-e-mohabbat 'zākir'

ranj ho ranj kā iz.hār na hone paa.e

zabt ki haar dil-e-zar na hone pae

dekh ruswa tera kirdar na hone pae

baghban ye bhi hai tazin-e-chaman ka hissa

gul ke pahlu se juda KHar na hone pae

baat KHud karte hain takrar ki us par ye sitam

KHud hi kahte hain ki takrar na hone pae

rind chaunkenge to maiKHane ki phir KHair nahin

dekh saqi koi hushiyar na hone pae

ai nasim-e-sahari aur zara aahista

husn KHwabida hai bedar na hone pae

un ke jalwon mein is andaz ki tabani hai

samne aaen to didar na hone pae

hai mohabbat mein yahi shart-e-mohabbat 'zakir'

ranj ho ranj ka izhaar na hone pae