zabt ki had se bhi jis waqt guzar jata hai

zabt kī had se bhī jis vaqt guzar jaatā hai

dard hoñToñ pe hañsī ban ke bikhar jaatā hai

rañg bhar jaatā hai phir ishq ke afsāne meñ

ashk ban ban ke agar ḳhūn-e-jigar jaatā hai

aaj tak ālam-e-vahshat meñ piye jaate haiñ

kitnī muddat meñ ghaTāoñ kā asar jaatā hai

jaam pī lete haiñ sab dekhnā hai zarf magar

kaun kis vaqt uThā aur kidhar jaatā hai

daur-e-vahshat meñ mohabbat meñ junūñ meñ insāñ

jo na mumkin ho kisī taur vo kar jaatā hai

apne begānoñ se kuchh besh the āzārī meñ

baat rah jaatī hai aur vaqt guzar jaatā hai

kitnā be-ḳhauf ho be-dard na kyuuñ ho āḳhir

aa.ina dekh ke a.amāl se Dar jaatā hai

vaqt kaT jaa.e agar ālam-e-tanhā.ī meñ

dil meñ ehsās-e-mulāqāt hī mar jaatā hai

vo jo duniyā kī haqīqat ko samajh le insāñ

apnī manzil kī taraf sīna-sipar jaatā hai

ālam-e-nāz meñ kuchh bhī to nahīñ tere sivā

ik tasavvur hai jo tā-hadd-e-nazar jaatā hai

saiñkaḌoñ daaġh chamakte haiñ tah-e-qalb ai 'shauq'

kitnī gahrā.ī meñ uf aks utar jaatā hai

zabt ki had se bhi jis waqt guzar jata hai

dard honTon pe hansi ban ke bikhar jata hai

rang bhar jata hai phir ishq ke afsane mein

ashk ban ban ke agar KHun-e-jigar jata hai

aaj tak aalam-e-wahshat mein piye jate hain

kitni muddat mein ghaTaon ka asar jata hai

jam pi lete hain sab dekhna hai zarf magar

kaun kis waqt uTha aur kidhar jata hai

daur-e-wahshat mein mohabbat mein junun mein insan

jo na mumkin ho kisi taur wo kar jata hai

apne beganon se kuchh besh the aazari mein

baat rah jati hai aur waqt guzar jata hai

kitna be-KHauf ho be-dard na kyun ho aaKHir

aaina dekh ke aamal se Dar jata hai

waqt kaT jae agar aalam-e-tanhai mein

dil mein ehsas-e-mulaqat hi mar jata hai

wo jo duniya ki haqiqat ko samajh le insan

apni manzil ki taraf sina-sipar jata hai

aalam-e-naz mein kuchh bhi to nahin tere siwa

ek tasawwur hai jo ta-hadd-e-nazar jata hai

sainkaDon dagh chamakte hain tah-e-qalb ai 'shauq'

kitni gahrai mein uf aks utar jata hai