ضبط کیا ہے بتا گئی تھی مجھے

ضبط کیا ہے بتا گئی تھی مجھے

وہ نظر سب سکھا گئی تھی مجھے

دار تک خود گئی تھی یاد آیا

اور پھر نیند آ گئی تھی مجھے

شاعری نے بچا لیا مجھ کو

ورنہ دنیا تو کھا گئی تھی مجھے

موت کو بد مزہ بھی کیسے کہوں

ذائقہ تو چکھا گئی تھی مجھے

زندہ رہنے کی بد نما خواہش

خوبصورت بنا گئی تھی مجھے

پھر نہ دیکھا گیا کسی جانب

وہ نظر ایسے بھا گئی تھی مجھے

دل بناوٹ سے اوب جاتا تھا

سادگی راس آ گئی تھی مجھے

زندگی تلخیاں دکھاتے ہوئے

اک تجلی دکھا گئی تھی مجھے

میں محبت کے دم سے روشن تھی

سرد مہری بجھا گئی تھی مجھے