zabt kya hai bata gai thi mujhe

zabt kyā hai batā ga.ī thī mujhe

vo nazar sab sikhā ga.ī thī mujhe

daar tak ḳhud ga.ī thī yaad aayā

aur phir niiñd aa ga.ī thī mujhe

shā'irī ne bachā liyā mujh ko

varna duniyā to khā ga.ī thī mujhe

maut ko bad-maza bhī kaise kahūñ

zā.iqa to chakhā ga.ī thī mujhe

zinda rahne kī bad-numā ḳhvāhish

ḳhūb-sūrat banā ga.ī thī mujhe

phir na dekhā gayā kisī jānib

vo nazar aise bhā ga.ī thī mujhe

dil banāvaT se uub jaatā thā

sādgī raas aa ga.ī thī mujhe

zindagī talḳhiyāñ dikhāte hue

ik tajallī dikhā ga.ī thī mujhe

maiñ mohabbat ke dam se raushan thī

sard-mehrī bujhā ga.ī thī mujhe

zabt kya hai bata gai thi mujhe

wo nazar sab sikha gai thi mujhe

dar tak KHud gai thi yaad aaya

aur phir nind aa gai thi mujhe

sha'iri ne bacha liya mujh ko

warna duniya to kha gai thi mujhe

maut ko bad-maza bhi kaise kahun

zaiqa to chakha gai thi mujhe

zinda rahne ki bad-numa KHwahish

KHub-surat bana gai thi mujhe

phir na dekha gaya kisi jaanib

wo nazar aise bha gai thi mujhe

dil banawaT se ub jata tha

sadgi ras aa gai thi mujhe

zindagi talKHiyan dikhate hue

ek tajalli dikha gai thi mujhe

main mohabbat ke dam se raushan thi

sard-mehri bujha gai thi mujhe