zabt se yun bhi kaam liya hai

zabt se yuuñ bhī kaam liyā hai

kāñToñ meñ ārām liyā hai

chāhe jidhar le jaa.e mohabbat

ab to dāman thaam liyā hai

kaash vahī ārām se rahtā

jis ne mirā ārām liyā hai

husn ne jab Thokar khaa.ī hai

ishq ne baazū thaam liyā hai

saaqī kā ehsāñ nahīñ ham par

ḳhuun diyā hai jaam liyā hai

Thokar khaa.ī baḌh ga.e aage

nākāmī se kaam liyā hai

husn-e-butāñ ko dekh ke 'shārib'

ham ne ḳhudā kā naam liyā hai

zabt se yun bhi kaam liya hai

kanTon mein aaram liya hai

chahe jidhar le jae mohabbat

ab to daman tham liya hai

kash wahi aaram se rahta

jis ne mera aaram liya hai

husn ne jab Thokar khai hai

ishq ne bazu tham liya hai

saqi ka ehsan nahin hum par

KHun diya hai jam liya hai

Thokar khai baDh gae aage

nakaami se kaam liya hai

husn-e-butan ko dekh ke 'shaarib'

hum ne KHuda ka nam liya hai