zahar ek duje ke andar bo raha hai aaj kal

zahar ik duuje ke andar bo rahā hai aaj kal

kis qadar zahrīlā insāñ ho rahā hai aaj kal

shahr apnā log apne aur apnā ghar bhī hai

aadmī kyuuñ phir bhī tanhā ho rahā hai aaj kal

vaqt se pahle mire bachche baḌe hone lage

ik ajab sā ye zamāna ho rahā hai aaj kal

aa.ine ke sāmne jaane se katrāte haiñ log

aa.ina bhī kitnā tanhā ho rahā hai aaj kal

phuul titlī rang ḳhushbū dost aur dushman sabhī

kāġhazī har shai kā paikar ho rahā hai aaj kal

is mashīnī daur kā in.aam hai ye ai 'zafar'

aadmī pahchān apnī kho rahā hai aaj kal

zahar ek duje ke andar bo raha hai aaj kal

kis qadar zahrila insan ho raha hai aaj kal

shahr apna log apne aur apna ghar bhi hai

aadmi kyun phir bhi tanha ho raha hai aaj kal

waqt se pahle mere bachche baDe hone lage

ek ajab sa ye zamana ho raha hai aaj kal

aaine ke samne jaane se katraate hain log

aaina bhi kitna tanha ho raha hai aaj kal

phul titli rang KHushbu dost aur dushman sabhi

kaghazi har shai ka paikar ho raha hai aaj kal

is mashini daur ka inam hai ye ai 'zafar'

aadmi pahchan apni kho raha hai aaj kal