zahe qismat ki qasid yar ka le kar payam aaya

zahe qismat ki qāsid yaar kā le kar payām aaya

magar afsos-sad-afsos vaqt-e-iḳhtitām aaya

karāmat dekhiye saaqī kī mastāna nigāhoñ kī

ki jis dam uTh ga.iiñ rindoñ talak ḳhud chal ke jaam aaya

hasad se haath mal kar rah ga.e saare raqīb us dam

zabāñ par jab kisī kī ittifāqan merā naam aaya

taras aatā hai us kī bebasī par ḳhud gulistāñ ko

jo taa.ir fasl-e-gul ke āte-āte zer-e-dām aaya

karoge yaad jab duniyā se ham ho jā.eñge ruḳhsat

kahoge tab yahī tū thā jo har mushkil meñ kaam aaya

ḳhatā kī ho kisī ne uñgliyāñ merī hī samt uTThīñ

kisī kā jurm ho sar par mire hī ittihām aaya

adhūrā-pan azal se thā likhā shāyad muqaddar meñ

ki ḳhushiyāñ kyā mire hisse meñ ġham bhī nā-tamām aaya

burā jab vaqt aaya sab ne 'yāsir' raah lī apnī

na koī chārāgar Thahrā na koī yaar kaam aaya

zahe qismat ki qasid yar ka le kar payam aaya

magar afsos-sad-afsos waqt-e-iKHtitam aaya

karamat dekhiye saqi ki mastana nigahon ki

ki jis dam uTh gain rindon talak KHud chal ke jam aaya

hasad se hath mal kar rah gae sare raqib us dam

zaban par jab kisi ki ittifaqan mera nam aaya

taras aata hai us ki bebasi par KHud gulistan ko

jo tair fasl-e-gul ke aate-ate zer-e-dam aaya

karoge yaad jab duniya se hum ho jaenge ruKHsat

kahoge tab yahi tu tha jo har mushkil mein kaam aaya

KHata ki ho kisi ne ungliyan meri hi samt uTThin

kisi ka jurm ho sar par mere hi ittiham aaya

adhura-pan azal se tha likha shayad muqaddar mein

ki KHushiyan kya mere hisse mein gham bhi na-tamam aaya

bura jab waqt aaya sab ne 'yasir' rah li apni

na koi chaaragar Thahra na koi yar kaam aaya