zahr-e-chashm-e-saqi mein kuchh ajib masti hai

zahr-e-chashm-e-sāqī meñ kuchh ajiib mastī hai

ġharq kufr o īmāñ haiñ daur-e-mai-parastī hai

sham.a hai sar-e-mahfil kuchh kahā nahīñ jaatā

shola-e-zabāñ le kar baat ko tarastī hai

zulf-e-yār kī zad meñ dair bhī hai kaaba bhī

ye ghaTā jab uThtī hai duur tak barastī hai

aaj apnī mahfil meñ hai balā kā sannāTā

dard hai na taskīñ hai hosh hai na mastī hai

kaun jā ke samjhā.e ḳhud-parast duniyā ko

kyā sanam-parastī hai kyā ḳhudā-parastī hai

saḳht jān-levā hai sādgī mohabbat kī

zahr kī kasauTī par zindagī ko kastī hai

ham to rah ke dillī meñ DhūñDte haiñ dillī ko

pūchhiye 'ravish' kis se kyā yahī vo bastī hai

zahr-e-chashm-e-saqi mein kuchh ajib masti hai

gharq kufr o iman hain daur-e-mai-parasti hai

shama hai sar-e-mahfil kuchh kaha nahin jata

shola-e-zaban le kar baat ko tarasti hai

zulf-e-yar ki zad mein dair bhi hai kaba bhi

ye ghaTa jab uThti hai dur tak barasti hai

aaj apni mahfil mein hai bala ka sannaTa

dard hai na taskin hai hosh hai na masti hai

kaun ja ke samjhae KHud-parast duniya ko

kya sanam-parasti hai kya KHuda-parasti hai

saKHt jaan-lewa hai sadgi mohabbat ki

zahr ki kasauTi par zindagi ko kasti hai

hum to rah ke dilli mein DhunDte hain dilli ko

puchhiye 'rawish' kis se kya yahi wo basti hai