zahr mein Dubi hui surKH hikayat mein gum

zahr meñ Duubī huī surḳh hikāyāt meñ gum

dil girafta hai havā mauja-e-asvāt meñ gum

munkashif hotā huā lamha-e-māzī kā nishāñ

aañkh jhapkī thī huā dūd-e-ḳharābāt meñ gum

shaam kī sā.at-e-avval meñ falak par jā kar

ham ne dekhā hai samundar ko ḳhayālāt meñ gum

ūñghtī raat ke māthe pe chamaktī bindiyā

dekh kar ho ga.ī nadiyā bhī savālāt meñ gum

vo jo ik lamha-e-hairāñ thā subuk-rau tanhā

ho gayā hai tirī āñkhoñ ke tilismāt meñ gum

muskurātā pas-e-tasvīr thā shā.ista samāñ

jaane kyuuñ ho gayā nādīda mahākāt meñ gum

vo qarīna jise sadiyoñ ne kiyā hai paidā

phir na ho jaa.e kahīñ shorish-e-jazbāt meñ gum

Dhal gayā kaise larazte hue tāroñ meñ hamīd

jo thā aañsū mirī palkoñ pe mudārāt meñ gum

zahr mein Dubi hui surKH hikayat mein gum

dil girafta hai hawa mauja-e-aswat mein gum

munkashif hota hua lamha-e-mazi ka nishan

aankh jhapki thi hua dud-e-KHarabaat mein gum

sham ki saat-e-awwal mein falak par ja kar

hum ne dekha hai samundar ko KHayalat mein gum

unghti raat ke mathe pe chamakti bindiya

dekh kar ho gai nadiya bhi sawalat mein gum

wo jo ek lamha-e-hairan tha subuk-rau tanha

ho gaya hai teri aankhon ke tilismat mein gum

muskuraata pas-e-taswir tha shaista saman

jaane kyun ho gaya nadida mahakat mein gum

wo qarina jise sadiyon ne kiya hai paida

phir na ho jae kahin shorish-e-jazbaat mein gum

Dhal gaya kaise larazte hue taron mein hamid

jo tha aansu meri palkon pe mudaraat mein gum