zahrab-e-gham ko aab-e-baqa kah liya karo

zahrāb-e-ġham ko āb-e-baqā kah liyā karo

har jaur-e-nā-ravā ko 'atā kah liyā karo

ye daur daur-e-lāf-bayānī hai dosto

nāḳhun pe ḳhuun ho to hinā kah liyā karo

sar-sar chale to ḳhūbi-e-guftār ke tufail

mauj-e-nasīm-o-bād-e-sabā kah liyā karo

kam-koshiyoñ pe apnī na sharmāo tum kabhī

nākāmiyoñ ko hukm-e-ḳhudā kah liyā karo

is daur-e-pur-fitan meñ jo ḳhūbī nazar na aa.e

apnī nigāh hī kī ḳhatā kah liyā karo

jalvoñ ke is hujūm meñ majbūr hai nazar

qasdan uThe to sahv-e-ravā kah liyā karo

zahrab-e-gham ko aab-e-baqa kah liya karo

har jaur-e-na-rawa ko 'ata kah liya karo

ye daur daur-e-laf-bayani hai dosto

naKHun pe KHun ho to hina kah liya karo

sar-sar chale to KHubi-e-guftar ke tufail

mauj-e-nasim-o-baad-e-saba kah liya karo

kam-koshiyon pe apni na sharmao tum kabhi

nakaamiyon ko hukm-e-KHuda kah liya karo

is daur-e-pur-fitan mein jo KHubi nazar na aae

apni nigah hi ki KHata kah liya karo

jalwon ke is hujum mein majbur hai nazar

qasdan uThe to sahw-e-rawa kah liya karo