zahrab ho ata ki mai-e-lala-gun mile

zahrāb ho atā ki mai-e-lāla-gūñ mile

saaqī kisī tarah mire dil ko sukūñ mile

ham log haiñ zamīn kī zīnat vagarna yuuñ

jhuk kar zamīn se falak-e-nīlgūñ mile

jin kī matā.a-e-aql pe duniyā ko naaz thā

vo bhī fareb-ḳhurda-e-duniyā-e-dūñ mile

dānishvaroñ ko dasht meñ dekhā gurez-pā

ahl-e-junūñ shanāvar-e-dariyā-e-ḳhūñ mile

ai ham-safar bahār kī manzil qarīb hai

har samt aaj raah meñ sailāb-e-ḳhūñ mile

ab tum ko ranj hai ki vo dīvāna ho gayā

aisā hī thā to 'ābid'-e-vahshī se kyoñ mile

zahrab ho ata ki mai-e-lala-gun mile

saqi kisi tarah mere dil ko sukun mile

hum log hain zamin ki zinat wagarna yun

jhuk kar zamin se falak-e-nilgun mile

jin ki mataa-e-aql pe duniya ko naz tha

wo bhi fareb-KHurda-e-duniya-e-dun mile

danishwaron ko dasht mein dekha gurez-pa

ahl-e-junun shanawar-e-dariya-e-KHun mile

ai ham-safar bahaar ki manzil qarib hai

har samt aaj rah mein sailab-e-KHun mile

ab tum ko ranj hai ki wo diwana ho gaya

aisa hi tha to 'abid'-e-wahshi se kyon mile